Imanol Pradales Lehendakariak gaur eguerdian inauguratu du STEEL TECH 2025, Congress & Expo, altzairugintza industriarako nazioarteko erreferentziazko topaketa. Hirugarren edizio honetan, ekitaldiak urrats bat gehiago eman du INTERNATIONAL STEEL WEEK ospatuz, Bilbao Exhibition Centren sektoreko enpresa liderrak, nazioarteko prestigiodun espezialistak eta balio-kate osoko eragileak bilduz.

Bere hitzaldian, Euskadin eta Europan altzairuaren industriaren etorkizuna bermatzeko, erantzukizun partekatua ematea eta ekintza politiko eta ekonomikoak bizkor abiaraztea eskatu du Pradalesek. Lehendakariak gogorarazi duenez, altzairua euskal manufaktura-industriaren sektore estrategikoa da, trakzio-lana egiten du, eta haren menpe daude milaka enplegu eta gure Herriaren aberastasunaren zati handi bat.

“Planak aspalditik zehaztuta daude. Orain ahalik eta azkarren gauzatu behar dira. Europako altzairuaren sektorea babesteko erabakiak hartzeko unea da. Jokoan ditugu milaka lanpostu, aberastasuna eta Euskadiko manufaktura-industriaren trakzio-jarduera baten bideragarritasuna”, nabarmendu du Pradalesek.

Inaugurazioan Elixabete Etxanobe, Bizkaiko Ahaldun Nagusia ere izan da, baita Fernando Espada, Siderexeko presidentea; José Noldin, AIST Europako Batasuneko Kapituluaren presidentea; eta Xabier Basañez, Bilbao Exhibition Centreko zuzendari nagusia ere.

Siderex – Siderurgiako Kluster Elkarteak – eta BEC erakundeen antolakuntzapean, UNESIDen lankidetzarekin, STEEL TECH, Congress & Expo-k erakusketa eta networking guneak biltzen ditu, sektoreak maila globalean dituen erronka eta aukeren ikuspegi integrala eskainiz.

Topaketaren hirugarren edizioak, gainera, askotariko proposamenak jasoko ditu hainbat eremutan: B2B bilerak, aurkezpenak, networkingeko jarduerak, STEEL TECH AWARDS sari-banaketa eta instalazioetara bisita teknikoak, talentuari eskainitako WORKinn Talent Hub espazio integralaz gain. Aukera paregabea da merkatuaren egoera ezagutu eta elkarlanerako bide berriak irekitzeko.

STEEL TECH, Congress & Expok Bizkaiko Foru Aldundiaren, ICEXen eta SPRI – Eusko Jaurlaritzaren babesa jaso du erakunde mailako bazkide gisa. Ekitaldian, gainera, UNESIDen lankidetza izango da sektoreko partner gisa, eta Steel Phalten eta ABBren babesa Urrezko babesle gisa, FROMM Packaging Systems, Siderwrap eta Tecnalia Research & Innovation Fundazioarekin batera, Zilarrezko Babesleen kategorian.

 

Maila goreneko nazioarteko kongresua

STEEL TECHen kongresuan hainbat herrialdetatik (Alemania, Austria, Herbehereak eta Suedia, adibidez) eta Estatutik iritsitako 40 hizlari inguru izango dira. Beren ezagutzak, esperientziak eta estrategiak partekatuko dituzte. Haien hitzaldiek sektorearen erronka nagusiei buruzko azterketa sakona eskainiko dute nazioarteko ikuspegian oinarrituta.

Hizlarien artean, enpresa eta erakunde hauetako ordezkariak daude: Europako Batzordea, AIST, Deusto Business School, Kanthal, SHS – Stahl-Holding-Saar, Tecnalia Research & Innovation Fundazioa, Cappel Stahl Consulting GmbH, Ibermática Innovation Institute, CEIT – Zentro Teknologikoa, EbnerGroup, TU Delft, BAIC, Badische Stahl-Engineering GmbH, Dribia Data Research, Kocks Measure + Inspect GmbH, TSR Resource, Beawre, UNESID, Celsa Group, Inductotherm Group, Leobengo Unibertsitatea, EU-BRITE, Stahl Holding Saar (SHS), Ebner Industrieofenbau eta Kocks Measure & Inspect.

Gaurko egunean zehar, Europako sektore siderurgikoaren eraldaketa, erronkak eta konponbide posibleak dituzte hizpide. Hitzaldiak eztabaidarako hiru multzotan multzokatzen dira: Europako industria siderurgikoaren eraldaketa karbono-neutraltasuna lortzeko; karbonorik gabeko energia-iturriak Europako industria siderurgikorako; eta burdinaz hornitzeko estrategia globalak. Izan ere, baliabide estrategiko horren erabilgarritasunaren, kalitatearen eta kostuaren arteko oreka funtsezkoa da altzairu jasangarria ekoizteko. Programak maila exekutiboko elkarrizketak, panel teknikoak eta ikerketa aurreratuenean oinarritutako aurkezpenak uztartuko ditu.

Biharko jardunaldia, urriaren 22koa, “Europako sektore siderurgikoa: erronkak, berrikuntza eta etorkizuna” izenburupean egingo da eta ikuspegi teknikoagoa izango du. Hala, altzairuaren industria arloko egungo aukerak eta erronkak sakondu nahi dituzten profesionalei zuzenduta egongo da. Besteak beste, Europako siderurgiaren egungo egoera, deskarbonizazio-prozesuak eta Adimen Artifizialak eraldaketa industrialean duen eragina aztertuko dira.

 

International Steel Week, aliantza estrategikoa

International Steel Week honako hauen arteko aliantzari esker sortu den ekimena da: STEEL TECH, Congress & Expo, eta European Steel Forum, zeinaren anfitrioia IDOM da. Bi ekitaldien arteko lankidetzak (lehenengo eguneko programa osorik partekatuko dute) erreferentziazko nazioarteko topaketa bat dakar. Horri esker, Bizkaia eta Euskadi siderurgiaren munduko erdigune bilakatzen dira. Aliantza horrek sinergia paregabeak sustatuko ditu, ezagutzaren trukea, nazioarteko lankidetza eta irtenbide berritzaileen garapena bultzatuz. Plataforma aitzindaria da, Siderex, Bilbao Exhibition Centre eta AISTen arteko akordioaren emaitza.

AIST- Association for Iron & Steel Technology elkarteak Estatu Batuetan du egoitza eta 70 herrialdetan banatuta dauden 18.500 kide baino gehiago ordezkatzen dituen irabazi-asmorik gabeko erakundea da. AISTek burdinaren eta altzairuaren industriaren garapen teknologikoa bultzatzen du, profesionalen arteko prestakuntzaren, ikerketaren eta harremanaren bidez. European Steel Forumaren erakunde antolatzailea ere bada; 30 herrialde baino gehiagotako adituak biltzen dituen topaketa da, eta aurten bere ediziorik nazioartekoena egingo du. Mundu osoan zehar dituen eskualde mailako 22 batzordeei esker, AISTek era askotako ekimenak antolatzen ditu.

 

Erakusketa eremua eta harreman profesionaletarako eremua

STEEL TECHen erakusketa eremua nabarmen hazi da aurtengo edizioan. Gune esklusibo horrek 64 enpresa erakusketari biltzen ditu. Horien artean, altzairu-fabrikak, ingeniaritza-enpresak, hornitzaileak eta eraldatzaileak izango dira, besteak beste Alemania, Austria, Estatu Batuak, Frantzia, Italia eta Suediatik etorritakoak (Estatu mailakoez gain).

Erakusketa eremuaz gain, networkingeko guneak ere protagonismo handia  du lankidetza- eta negozio-aukera berriak bultzatzeko gune gisa. Testuinguru horren baitan, nabarmendu beharrekoa da B2B topaketak. Hala, hitzartutako bilerak egiten ari dira erakusketarien, babesleen eta nazioarteko VIP gonbidatuen artean. Programa horren barruan, ICEX España Exportación e inversionesekin adostutako hitzarmenaren bidez garatutako “Siderurgia: produktuak, makinak eta ingeniaritza” sektoreko planaren baitan, 13 herrialdetatik iritsitako maila handiko 20 erosle baino gehiagorekin misio alderantzikatua antolatu da. Jarduera horren beraren baitan, Bilbao Exhibition Centrek eta SIDEREXek, Kluster hitzarmen-programaren bidez Eusko Jaurlaritzarekin eta Nazioartekotzeko Euskal Agentzia – Basque Trade & Investmentekin eta haren Kanpo Sarearekin elkarlanean, Kolonbiatik iritsitako bezero potentzialak gonbidatuko ditu.

Horrez gain, jarduera paraleloak ere eskainiko ditu STEEL TECHek, hala nola Innovation Workshops eta Poster Teknikoen Eremua; teknologiaren, ingurumenaren eta berrikuntzaren arloko aurrerapenei buruzko 21 proposamen aurkeztu dituzte horietan. Bestalde, ekitaldi sozialak ere izango dira, esaterako, Afterwork Drink izenekoa eta gala-afaria. Azken hori urriaren 22an egingo da eta honako hiru kategoria hauen arabera bikaintasuna aitortuko duten STEEL TECH AWARDS sarien 3. edizioaren sari-banaketa jasoko du: Women in Steel, altzairugintzaren arloan emakume batek egindako ibilbide profesionala aitortzen duena; Communication Forum, industria honekin lotutako dibulgazioko eta sustapeneko ekimen onenari emandakoa; eta Startup Challenge, siderurgiaren sektorean bolumen eta kontzentrazio baxuko prozesuetan Co₂-ren kaptura eta baloraziorako soluzio berritzaileenak aitortzen dituena. Honako hauek dira finalistak: SBS – Thermal Technologies, Orchestra Scientific y Lightnet Carbon Capture.

Urriaren 23an, altzairuaren sektoreko enpresa eta azpiegitura estrategikoetara egindako bisita teknikoekin emango zaio amaiera STEEL TECH ekimenari. Jarduera honen bidez, zuzenean ezagutu ahal izango dira sektorearen etorkizuna definitzen ari diren instalazioak, prozesuak eta teknologiak, eta zuzenean erakutsi ahal izango dira Bizkaian eta Euskadin produkzioan eta jasangarritasunean egin diren aurrerapenak.

 

WORKinn Talent Hub for STEEL TECH

WORKinn Talent Hubek, industria arloan espezializatutako enplegu-foroak, siderurgiaren sektoreari eskainitako edizioa egingo du bihar, urriaren 22an, STEEL TECH, Congress & Exporen barruan eta goizeko ordutegian. Topaketak erreferentziazko enpresa eta erakundeak eta lan bila dabiltzan ikasle eta profesionalak lotuko ditu, eskaintzaren eta eskariaren arteko zuzeneko harremana bilduko dituen gunea eratuz.

Altzairuaren industriak erronka handiak ditu aurrean eta digitalizazioa, jasangarritasuna eta berrikuntza teknologikoa izango dira horren oinarriak. Hori dela eta, beharrezkoak izango dira erronka berriei aurre egiteko prestatutako profilak. Testuinguru honen baitan, talentua erakarri eta garatzea ezinbestekoa da lehiakortasuna eta belaunaldien arteko erreleboa bermatzeko. Giza baliabideetako arduradunekin zuzenean harremanetan jartzeko jardunaldia izango da, eta bertaratzen direnek bertatik bertara ezagutu ahal izango dituzte haien proiektuak, eta siderurgia sektoreko konpainia garrantzitsuenetako batzuetan lan egitea nolakoa den ikusteko aukera ere izango dute.

AFM Cluster for Advanced Manufacturingek, Bilbao Exhibition Centrek eta Siderexek antolatzen dute WORKinn Talent Hub for STEEL TECHen lehen edizio hau.