Egurtek Egurrezko Arkitekturari eta Eraikuntzari buruzko Nazioarteko Foroaren bederatzigarren edizioak sektoreko profesional oso nabarmenak bilduko ditu Bilbao Exhibition Centren, urriaren 19an eta 20an. Soluzio berritzaile eta azken joera ugari aurkituko dituzte Expo gunean. Bertan parte hartuko dute Finsa, Schilliger Bois, Essepi, Egoin edo Baskegur, Euskadiko Zur Elkartea edo Advantage Austria elkarteek, eta haiei esker, sektorearen egoeraren argazkia eskainiko da. Horietako asko azokarekiko erakusketari leialak dira.

Azken edizioetan kongresuak berak hartu duen indarrak eragina izan du azokan; izan ere, bertan biltzen dira estatuko egur-eraikuntzan eta -arkitekturan berariaz diharduten enpresa parte-hartzaile gehien. Guztira, nazio mailako nahiz nazioarteko 50 enpresa inguruk baieztatu dute dagoeneko parte hartuko dutela, eta horietatik ia % 50ek parte hartu du dagoeneko azokaren edizioren batean.

Guztiek arkitekturarekin, egurrezko etxeekin, zurarentzako tratamenduekin, eraikuntza jasangarriarekin, aldizkariekin, elkarteekin, ingeniaritza eta dekorazioarekin, eraikuntzarako egurrarekin, egituren softwarearekin eta zuraren, elementuen eta materialen inportatzaileekin lotutako produktuak eta zerbitzuak eskainiko dituzte. Egurtekeko talde komertzialak azokaren promozioarekin jarraitzen du, eta horren erakusgarri da Rebuild, Carrefour du Bois edo antzeko beste azoka batzuetara joan izana.

Expo gunean (espazioaren % 70 inguru dagoeneko erreserbatuta dago), Baskegurreko jardunaldi teknikoak, Speakers Corner-ak, Egurtek sarietako panel parte-hartzaileen erakusketa edo Kongresuko coffee-break-ak ere izango dira.

Bilbao Exhibition Centrek antolatzen du Egurtek, Baskegur – Euskadiko Egurraren Elkartearen eta Euskal Herriko Arkitektoen Elkargo Ofizialaren laguntzarekin, eta Eusko Jaurlaritzako Ekonomiaren Garapen, Jasangarritasun eta Ingurumen Sailak diruz babestuta.