Expovacaciones 2026k turismo-sektorerako erreferentziazko gune gisa duen posizionamendua indartuko du, arlo profesionalera zuzendutako eduki berriak gehituta. Azoka BECen egingo da maiatzaren 8tik 10era, eta lehenengo egunean “Gobernanza del Turismo Inteligente: datos, distribución y bienestar residente” (Turismo Adimendunaren Gobernantza: datuak, banaketa eta egoiliarren ongizatea) hitzaldia hartuko du, profesionalei zuzendua eta Basquetourrek antolatua. Bi saiotan egituratutako jardunaldia Daniel Solanak inauguratuko du, eta Nagore Uresandi Espinosaren, IN2destinationeko CEO eta sortzailearen, eta doktorearen aurkezpena izango da entzungai.

Lehenengo saioan, “Gestionar los flujos turísticos: medición y equilibrio en el espacio público” (Fluxu turistikoak kudeatzea: neurketa eta oreka espazio publikoan) (09:30etik 10:20era), Elisabeth Markussen eta Miroslav Draškovićek hartuko dute parte. Elisabeth Markussen Wonderful Copenhageneko Senior Managerra da, CopenPay proiektua zuzentzen du eta esperientzia du estrategia komertzialean, markaren kudeaketan eta berrikuntza digitalean. Bestalde, Miroslav Drašković Dubrovnikeko Turismo Bulegoko zuzendaria da. Sektorean ibilbide luzea egin du eta turismogunearen garapen turistikora bideratutako lana egin du.

Bigarren saioak, “Gobernanza urbana y regulación de las viviendas de uso turístico: residentes e identidad en el centro” (Hiri-gobernantza eta erabilera turistikoko etxebizitzen erregulazioa: egoiliarrak eta identitatea erdigunean) izenekoak (10:30etik 11:20era), Bart Rondas eta Finbarr Filan bilduko ditu. Bart Rondas Gante hiriko Ekonomia eta Turismo Saileko zuzendariordea eta hiri-plangintzan aditua da. Finbarr Filan Sligo Business Improvement District (BID) eta ISME erakunde nazionalaren buru da, eta enpresen, erakundeen eta tokiko komunitatearen arteko sareko elkarlana bultzatzen du.

Aitortza turismo etikoarekiko konpromisoari

Posizionamendu horren ildotik, Expovacacionesek Etikoa Ziurtagiria izango du 2026an. Hain zuzen ere, Bilbao Exhibition Centrek ekimen horrekin bat egin du Barakaldo turismogunearen pean, eta jasangarritasuna, gizarteratzea, erantzukizuna eta ingurunearekiko eta tokiko komunitateekiko errespetua bezalako balioak dituzten erakunde eta eragileen konpromisoa aitortzen du. Bereizgarri hori sartu izanak indartu egiten du azokak turismo kontzienteagoa, bidaiarien egungo eskaerekin eta sektorearen egungo erronkekin bat datorrena, sustatzearen alde egindako apustua.

Horrelako ekimenekin, Expovacaciones, turismoguneak eta esperientziak aurkezteaz gain, etorkizunera begira dagoen turismorako hausnarketarako eta eraldaketarako espazio gisa posizionatu da. 46. edizio honetan, Estatuko eta nazioarteko turismoguneen, turismo aktiboko proposamenen, gastronomiaren, familientzako esperientzien eta “Esperimentatu” eta “Dastatu” ardatzetan inspiratutako espazioen eskaintza zabala elkartuko da, eta bidaiarien eta turismo-sektoreko azken joeren arteko topagune gisa finkatuko da.