Familietako txikienen Gabonetako ilusioa berriro ere protagonista ari da izaten Bilbao Exhibition Centren. 200 ikastetxe baino gehiagotako ikasleak, batez ere Bizkaia, Araba, Kantabria, Gipuzkoa, Burgos, Errioxa edo Nafarroakoak, Umeen Gabonetako Parkeaz gozatzen ari dira egun hauetan.

Aste honetan ere, eskola-oporrak oraindik hasi gabe daudelako jende gutxiago biltzen dela aprobetxatuz, UGP inklusiboagoa eta eskuragarriagoa egiteko neurriak hartu dira. Leihatiletan lehentasunez sartzea edo argiztapena egokitzea eta pabiloietako soinua egokitzea izan dira dibertsitate funtzionala duten pertsonei laguntzeko eta haien gozamena bultzatzeko ezarri diren neurrietako batzuk.

Kirola protagonismo handia izaten ari da UGPn. Izan ere, astearte honetan BizkaiBiziren aurkezpena egin zen 1. pabiloian, Garraio eta Mugikortasun Jasangarriaren Sailaren eskutik. Hurrengo asteei dagokienez, BECek urtarrilaren 7an Bizkaiko Atletismo Federazioarekin batera antolatutako Gabonetako Lasterketaz gain, UGPren edizio honek Bizkaiko federazioek antolatutako Saskibaloiko eta Eskubaloiko Txapelketa ere izango du. Hain zuzen ere, datorren astelehenean, abenduaren 26an hasiko da. Asteazkenean, abenduaren 28an, hasiko da Gabonetako IV. Miniatletismo Txapelketa. Bestalde, Mahai Tenisa eta Beisboleko Bateo tunela zabalik egongo dira eguberri guztietan.

UGPk bat egin du, beste behin ere, Bizkaiko Gurutze Gorriak Gabonetarako prestatu duen jostailu berri, ez beliko eta ez-sexistak biltzeko kanpainarekin. Horrela, urtarrilaren 4ra arte, jostailuak 1. pabiloiko sarreraren ondoan dagoen atrioko informazio-gunean bilduko dira.