Kalamuaren sektoreak mundu mailan une ezin hobea bizi du. Kalamu medizinalak izandako gorakada da sektore horrek izandako hazkundearen eta onarpenaren erakusgarri argia, eta Espainia mundu mailan zazpigarren postuan kokatu da kalamu medizinalaren ekoizpenari dagokionez. Hala, legezko ekoizpenaren gorakada % 53koa izatea espero da eta, gainera, Osasun Ministerioak Espainian kalamuaren erabilera medizinala arautzeko izapidetzeak hasi ditu. Horretarako, herritarrek ekarpenak egin ditzaten kontsulta publikorako aldia ireki dute.

Hain zuzen ere, hazkunde- eta bilakaera-testuinguru horrek bultzatu du Spannabis Bilbon ospatzea. Sustrai kultural sendoak eta nortasun propioa dituen hiria da Bilbo eta, ondorioz, eszenatoki ezin hobea da tamaina horretako ekitaldia antolatzeko. Irailaren 20tik 22ra izango da, BECen, eta sektorearen nazioarteko begirada guztiak jarriko dira Bilbon eta Euskadin.

Spannabis Bilbao 2024k jarduera ugari eskainiko ditu, kontzertuak, showroom-ak, produktu berritzaileen erakusketak eta politika, medikuntza edo komunikazio arloetako adituekin egingo dituzten hitzaldiak barne. Sektoreko enpresa eta elkarte nagusiek parte hartuko dute ekitaldian, networkingerako eta sinergiak sortzeko aukera paregabea eskainiz.

“Spannabisen edizio honetarako Bilbo aukeratu genuen haren historia aberatsa eta beti berrikuntzara bideratutako espiritua direla eta. Euskadi kalamuaren etorkizuna berriro definitzen ari den mundu mailako mugimendu horren zati izatea nahi dugu”, adierazi du Spannabisen bozeramaileak, Raúl del Pinok.